Thirrje për aplikime!

 

Këshilli i Evropës, në bashkëpunim me Dhomën Kombëtare të Avokatisë, njoftojnë avokatët shqiptarë se në muajin Prill 2013 do të fillojë të zhvillohet kursi në distancë (online) “Mbi respektimin e kritereve të Pranueshmërisë në aplikimet e depozituara pranë Gjykatës Evropiane të të Drejtave të Njeriut”.

Ky kurs në distancë do të kryhet në kuadër të Programit Evropian për Edukimin e Profesionistëve të Ligjit mbi të Drejtat e Njeriut (shkurtimisht Programi HELP, i cili mbështet shtetet anëtare të Këshillit të Evropës që të bëjnë të mundur implementimin efektiv të Konventës Evropiane të të Drejtave të Njeriut në nivel vendas).

Personat e interesuar për të ndjekur këtë kurs në distancë duhet të përmbushin këto kritere:

1) Të kenë mbaruar Fakultetin e Drejtësisë,

2) Të kenë licencë avokati ose të jenë të regjistruar pranë Dhomës Kombëtare të Avokatisë si asistent/avokatë,

3) Të kenë njohuri të Gjuhës Angleze,

4) Të kenë njohuri informatike,

5) Pjesëmarrjet në Aktivitetet e të Drejtave të Njeriut dhe aktivizimi si përfaqësues ligjorë të ankuesve përpara Gjykatës Evropiane të të Drejtave të Njeriut do të kenë një prevalencë në përzgjedhjen e kandidatëve.

Të gjithë personat e interesuar të nisin një CV dhe një kopje të teserës së avokatit të vitit 2013 /ose teserën e asistent avokatit, në postën elektronike të mëposhtme erindameli@yahoo.com brenda datës 15 Mars 2013.

QËLLIMI I KËTIJ KURSI

Në këtë kurs do të merrni njohuri mbi kushtet që kanë të bëjnë me pranueshmërinë e ankimeve që paraqiten përpara Gjykatës Evropiane të të Drejtave të Njeriut (Gjykata) në bazë të Konventës Evropiane të të Drejtave të Njeriut. Duke qenë se shumica e aplikimeve nuk e kalojnë stadin e pranueshmërisë (duke përfshirë edhe ato cështje që kanë të bëjnë me probleme të rëndësishme të të drejtave të njeriut), qëllimi i këtij kursi është ardhja në ndihmë e avokatëve të cilët paraqesin aplikime përpara Gjykatës që të kuptojnë të gjitha kriteret e ndryshme që lidhen me fazën e pranueshmërisë, me qëllim që të kalohet në fazën tjetër (atë të themelit të një cështjeje). Në këtë mënyrë, shpresohet që ky kurs dhe materialet shtesë jo vetëm do t'ju shpëtojnë kohën e humbur me përgatitjen e atyre aplikimeve të cilat në mënyrë të pashmangshme do të konstatohen si të papranueshme nga Gjykata por gjithashtu shpresojmë që ky kurs do t'ju ndihmojnë që të bëni vlerësimin e duhur me qëllim që të paraqisni pretendime të bazuara mirë në Konventë për ato të drejta të njeriut që janë shkelur.

Kursi nuk ka për qëllim që të japë njohuri të detajuara të Konventës dhe jurisprudencës së Gjykatës por shpreson që elementë të vecantë të Konventës mund të jenë të nevojshme për ju edhe në rastet kur tashmë keni depozituar një aplikim përpara Gjykatës.